ქალო გშვენის ნარნარ ფერის
სიფრიფანა კაბა,
კეკლუცურად გიშრის თვალებს
სიმორცხვისგან ნაბავ...

ჰოი, შენი სიფაქიზე
ვარდზე უფრო მწველი,
ყოველი დღის გათენებას
მზეზე მეტად ელი.

გაშლი მკლავებს, ათრთოლდება
ქალო სავსე მკერდი,
ნიავი ქრის, გეფერება
შენ კი ნიავს ეტრფი.

ასე ლაღად, მონარნარედ
ჩამოივლი ქუჩებს,
ნეტავ იმ ვაჟს, ვინც ორმაგად
დაგიკოცნის ტუჩებს.

მერე ისევ ბედნიერი,
ეპრანჭები მთვარეს,
მერე ზღვას, და ცაც ოცნების
სადღეგრძელოს დალევს...

ჰოი, ქალო ვინამ გშობა
ასე უდარდელი,
ასე მარდი, ასე ცელქი,
სიზმრებივით ჭრელი...

მინდა ფიქრად აგედევნო
და მიგიკრა მკერდზე,
მაცდური და მოკამკამე
გაჩნდი შენ ჩემ ბედზე.

18.08.2010