მისაღები გამოცდები წარმატებით ჩააბარა. მათემატიკის ზეპირ და წერით გამოცდებში ფრიადები რომ მიიღო, ფიზიკის გამოცდაზე დანდობილად შევიდა. გამომცდელმა აქაც ფრიადი დაუწერა, მაგრამ კომისიის თავმჯდომარე განაწყენდა, ჩემს გარეშე მაღალი ნიშანი რატომ დაწერეთო.
          – რა სიჩქარით უნდა მოძრაობდეს ფოლადის ბურთულა, რომელიც რაღაც წინაღობაზე შეჯახებისას ზედ შეადნეს?
          ასეთი კითხა-ამოცანა დაუსვა კომისიის თავმჯდომარემ და რადგან მაშინვე ვერ მიიღო პასუხი, საგამოცდო ფურცელში ჩაწერილი „ფრიადის“ ქვეშ შეფასება „კარგი“ მიუწერა.
          – რა ნიშანი მიიღე? მაშინვე შემოეხვივნენ აბიტურიენტების ახლობლები და კითხვები დააყარეს.
          – რა მივიღე და „ცხრიანი!“ – სიცილით უპასუხათ.
          დედას ცუდად ენიშნა ღიმილიანი „ცხრიანი“. შეშფოთებულმა თვალებში ჩახედა შვილს და განმარტება სთხოვა.
        – უი, მარჯვენა კი გაუხმეს ამის დამწერსა! – სიცილს ვერ იკავებდნენ ახლოს მდგომნი და თან ხელიდან ხელში გადადიოდა საგამოცდო ფურცელი, სადაც ერთ საგანში ორი ნიშანი ეწერა – „ფრიადი“ და „კარგი“.
        ქართული ენის გამოცდაზე კი მხოლოდ წაკითხულის შინაარსის გადმოცემა იყო საჭირო.

                                                                      * * *
        ნათესავის სახლისაკენ ფრენა-ფრენით მიმავალმა ორმო ვერ შეამჩნია და ფეხი იღრძო... მეორე დღეს მაინც მოიარა ინსტიტუტის ახლოს მდებარე გასაქირავებელი ბინები, მაგრამ ყველა რატომღაც უარს ეუბნებოდა. ბოლოს ერთმა მოხუცმა ცოლ-ქმარმა შეიკედლა.

                                                                      * * *
        – უკაცრავად ახალგაზრდავ! თქვენ ის არა ხართ, ერთი კვირის წინ ქირით ბინას რომ ეძებდით?
        – ალბათ!.. რატომ გაინტერესებთ ქალბატონო?
        – რატომ აღარ კოჭლობთ?
        – უბრალოდ ფეხი მქონდა ნაღრძობი და რამდენიმე დღეში გამიარა...
        – მერედა ვერ თქვი შე კაი დედ-მამის შვილო კოჭლი რომ არ იყავი?
        – ამას რა მნიშვნელობა აქვს ქალბატონო?
        – ის მნიშვნელობა აქვს რომ ბიჭად კარგი ხარ, მაგრამ კოჭლი სიძე არ მინდოდა! დანანებით ჩაილაპარაკა ქალმა და გვერდზე მდგარ „წიწაკის მწნილივით“ ანგელოზს გადახედა...
        – ? ? ?