"Les Essais"
მე რომ კალამი ავიღე ხელში
და აღარ დავდე.
როცა გნახულობ თქორდება თქეში,
მინდა, რომ მგავდე.
რა ლამაზი და ამაო ცდაა!
მე გელოდები,
თუმცა, კარგად ვიცი, არ მოხვალ.
განვმეორდები
ლოდინის მიღმა და შენს გამოღმა.
რა ლამაზი და ამაო ცდაა!
ოცნებაც ცდაა,
ვნების გამოცდა
მწარე, ამო ცდა.
უშენო ცაა,
ფიქრს რომ გამოცდა.
რა ლამაზი და ამაო ცდაა!
შენი ხასიათი და ლექსის საზომი
მინდება ხოლმე, გავასხვაფერო,
ოდნავ შევაბრუნო წამზომი,
დრო გავაჩერო.
რა ლამაზი და ამაო ცდაა!
მე მიყვარს ცდები,
რაღაცნაირად
და როცა ცდები
შენს შეცვლას ვცდილობ:
რა ლამაზი და ამაო ცდაა!