ფერმკრთალ ღაწვებზე მოგედება ისევ ალმური
და სავსე მკერდი ათრთოლდება ვით თასი ღვინით,
წყლიან თვალებში წაიკითხავ კვლავაც ვედრებას,
სისხლიან გულში ვნების ცეცხლი ისევე ღვივის...

ნაზი თითებით შეეხები ტუჩებს მხურვალეს,
შენ მთელი ტანით თრთიხარ, როგორც ნაზი ნიბლია
თოვლისფერ სხეულს დაგისერავს ოფლის წვეთები,
ნაკადულივით შენზე კიდევ დიდხანს ივლიან...

კვნესა მაღალი, ცას მისწვდება სიამოვნების,
უაზრო ბგერებს გაიგონებ მგზნებარე ხმაში,
ნელ-ნელა ცხრები, დამშვიდდები და დავარდები
როგორც კუნძული ადუღებულ სისხლისფერ ზღვაში.