გადამათენდა ეს ღამეც თავზე
დილის შემოჰკრა ზარი მეტეხმა,
გუშინ ნამთვრალევს ცასავით ლურჯი
შენი თვალები შემომეჩეხა.

იმ დღის მერეა არ ვიცი რა მჭირს
მიწა დამძიმდა თუ სივრცე მიჭერს,
ასეთ დღეში ვარ ჩემი თვალები
შენი თვალების მზერას რომ იჭერს.

აფეთქდა გული, ადუღდა სისხლი,
ვიცი, განაჩენს ელოდებიან,
ჩემი ბრალია შენი თვალები
სატირლად რომ არ მემეტებიან.

ცა გადაღლილი დაეყრდნო მიწას
მთვარე უშუშებს ღამეს ლავიწებს,
რომ დამავიწყდეს ამ ქვეყნად ვინ ვარ
მაგ თვალებს მაინც რა დამავიწყებს.

ვიცი ცხოვრება გადამყრის ხიფათს,
და იქნებ სადმე დამიგოს მახე,
იცი? ცა მიყვარს მას შემდეგ როცა
პირველად შენი თვალები ვნახე.