მინდა მოხვიდე ქუჩაში და საათი მკითხო,
მე გიპასუხებ - რომ გველები ეძებენ სოროს,
ხოლო განთიადს ძველებურად, ფერი აქვს მიტკლის
და საერთოდაც ეს საათი არ არის სწორი.
მინდა მოხვიდე ქუჩაში და სხეული მთხოვო,
მე გიპასუხებ რომ ამ წუთას გავყიდე ბოლო,
მერე სიზმრები (მოგონილი) უცნაურ თხრობით,
მოგითხრო, ჩემო ვერშერთულო და მაინც ცოლო.
ჩამოვუარო და მათხოვრებს მივუგდო ლეში,
დედა ვუგინო (აღსანიშნავ) ახალ თარიღებს,
დაგაორსულო, სამუდამოდ დავსახლდე შენში,
აღარ წავიდე.
მინდა უსაზღვროდ, აღარაფერს ჰქონდეს საზღვარი,
რომ გაგვიკეთონ ცხოვრებაზე რამე ვაქცინა
და ჩვენი ყოფა, რეალობით ასე გამძღარი,
არდასიზმრებულ, ფორთოხლისფერ სიზმრად ვაქციო.