-  ბებო, დღეს დედა ექიმთან წაგვიყვანს?
- არა ბებო, დედა ვერ მოვა, ზეცაში ცხოვრობს.
-  ბე, არც მამა მოვა? - ახლა ბიჭი ჩაენაცვლა კითხვით პატარა დაიკოს.
- არა ბებო, მამაც ზეცაშია, დედასთან. -  მოხუცმა სევდიანად ახედა კედელზე ჩარჩოს, საიდანაც ახალგაზრდა ცოლ-ქმარი იმზირებოდა.
- ბებო, ნინოს დედიკო და მამიკო რატომ არ ცხოვრობენ ზეცაში?
კარი გაიღო და ექიმი შემოვიდა...
-  როგორც კი გავიგე, ბავშვებს მაღალი სიცხე ქონდათ, მაშინვე გამოვიქეცი.
-  მობრძანდი შვილო, შენ გაგახარებს ღმერთი! არ ვიცი რა ვქნა, სიცხე ვერ დავუგდე სამი დღეა. წამლებიც ისეთი ძვირი ღირს, მე კი არაფრის საშუალება მაქვს.
- წამლებს მე ვუყიდი, თქვენ არ იდარდოთ, მთავარია ახლა ბავშვები გამოჯანმრთელდნენ. არაფერი მინდა თქვენგან, ოღონდ აქ ვერ დავეხმარები, ქალაქში უნდა წავიყვანო გასასინჯად, ანთება არ იყოს...
  რამდენი ხალხი ყოფილა ქალაქში, რამდენი მანქანაა ან რამდენი ბავშვი?! - უკვირთ პატარებს... დედამ ვერა, მაგრამ ექიმმა კანფეტები უყიდა მათ.
- ეს ბებოს წავუღოთ!- შეინახა ქურთუკის ჯიბეში პატარა ბიჭმა.
- შენ მეტი აღარ გაქვს? აი, მე გაგიყოფ! - ცოტა მოაკბიჩა გოგონამ კანფეტს და უფრო დიდი ლუკმა ძმას ჩაუდო პირში...