ერთი ნაბიჯი გაშორებს... ცამდე,
და მკერდის პირით ჰაერს ეყრდნობი,
ალბათ ათასი ბილიკი ცადე,
ახლა უყურებ გაფრენას ორბის
შორი მთებისკენ... გინდა კლანჭებით
შემოაგლიჯოს ამინდს სინაზე
ერთი ნაბიჯი... მერე ღამდება
სივრცეს სიცივე ავსებს პირამდე.
წვეთები ძიძგნის დასერილ ღრუბლებს
რომლებსაც ზეცა მაჯებად ხმარობს,
ალბათ ჩემსავით შენც მზისკენ უფრენ,
ერთი ნაბიჯიც... შენ გავხარ ფაროსს
ან დაქცეული ზევსის კვერთხივით
გადაეშვები ციდან მიწამდე,
შენ მხოლოდ ერთი ნელი ნაბიჯით
გამასწარი და არ  დამიცადე...
და ეს ნაბიჯი აშორებს მზეებს,
ჩამოქცეული ხევის ძირამდე.
ორბებს შევები მერე და დღეს მეც
ერთი ნაბიჯი დამრჩა შენამდე...