-Hello teacher!
სალომე მეოთხე კლასელია, მარი - მესამე, ინგლისურს ვასწავლი კვირაში ორჯერ. შევდივარ ღარიბულ ოთახში. კუთხეში შაოსანი ბებია ქსოვს. ახალ სიტყვებს ვუხსნი: A lake - ტბა, A snake - გველი...
- უხსენებელი მას, - ორივე ერთდროულად იწერს პირჯვარს.
მეღიმება.
- მასწავლებელო თქვენ მორწმუნე ხართ? - მარი მეკითხება - მეტიჩარა და გაბედული.
ვშრები. 
ბებია მიხსნის:
- ამათი ბიძა ფსკვნილებს ამზადებს, გუშინ შეჭამეს, მასწავლებელს უნდა ვაჩუქოთო.
- მარხვას იცავთ? - ახლა სალომე მიყურებს თვალებში.
- ექიმმა ამიკრძალა - ვპოულობ გამოსავალს.
- დილა-საღამოს ლოცვებსაც არ კითხულობთ?
აღარ შეიძლება იმედი გავუცრუო: - კი.
- ესეიგი უნდა გაჩუქოთ - გახარებული სალომე ბიძასთან გაქცევას აპირებს.
- არა, მამაოს კურთხევაა საჭირო (მეგობრებისგან ვიცი)!
- უი, თქვენ რა მორწმუნე ყოფილხართ!  - სალომე მეხუტება და ჯდება.
მრცხვენია:
A snake - უხსენებელი - ვამბობ.