გულს მინგრევს , ტანსაცმელს მირღვევს, ცუდად ვხედავ, ყველაფერი ნაცრისფერია, მხოლოდ ცა არის წითელი. ზევით ახედვა გულს მიხეთქავს. სარკეში ვეძებ _ არ ვიცი რას. რაღაცას. შენ გეძებ, ჩემს თავსაც, მგონი ყველაფერი ვიპოვე, ვიღაცისთვის არაფერია, ჩემთვისაც არაფერია, ყველაფერი შენ ხარ, შენ აღარ ხარ, მალე აღარც მე ვიქნები, სარკე ჩამყლაპავს. თითქოს უკან ვიღაც მიდგას, გიჟივით ვტრიალებ იქით-აქეთ, არა, ვიღაც აშკარად უკან მიდგას, შიში მიპყრობს, მიყვარს როცა მეშინია. კედელს ზურგით ვეყრნობი, კედელი თითქოს სუნთქავს, მეხუტება, მინდა ვიყვირო, მაგრამ ჩემი თავის მეშინია. გარეთ წვიმს, წვიმა კარზე მიკაკუნებს, მაგრამ ვერ შემოვუშვებ, გარეთ ვერ გავდივარ, წვიმა მიცდის, სახლში ღრუბლებია. ოთახში თბილა, მაგრამ ჩემთვის არა, სარკე კი ისევ ცივია. სარკეს ვამტვრევ, შიგნით უკვე ათას მეს ვხედავ, ძალიან კარგი, მარტონი აღარ იქნებიან. წვიმას კარს ვუღებ, ცოტა მორცხვია, არ შემოდის. შენს თავს წვიმას ვატან, შენ და წვიმა ხელიხელჩაკიდებულები მიდიხართ, ერთმანეთს უხდებით. დღეს ორი უკიდურესობიდან არაფერი ავირჩიე, ანუ ყველაფერი, ყველაფერი შენ ხარ, არაფერია ყველაფერი, მაგრამ მე მაინც არაფერს ვირჩევ. ნახვამდის, არა არ მომწონს, უფრო, კარგად, ან მშვიდობით, არა, არცერთი მომწონს. არ გემშვიდობები, არ გამომივიდა, არაფერი გამომდის, მერე რა, არაუშავს, სიცივე კლავს, მე ვკლავ სიცივეს, ამ ბოდვით კი სიჩუმე მოვკალი, მარტოობის მოკვლა სარკეში მინდა, სარკე დამტვრეულია, მაინც მარტო ვარ, წვიმა წავიდა, შენც წახვედი, ლოგინი ისევ წარიელია, ჩემი ხელებიც, გულიც ცარიელია, მეც დავცარიელდი. ყოველთვის ვეძებდი ვინმეს, შენნაირს, მაგრამ ერთადერთი ხარ, სამწუხაროდ. შენც ალბათ მარტო ხარ, ყოველი ახალი დღე ხასიათს მიფუჭებს, წარსული დღეები ჩემს ხასიათს გაყვა, მომავალი კი შენ გამოგყვა, შენ წვიმას გაყევი. მინდა დავიძინო მაგრამ უკვე მძინავს. სახლიდან გავდივარ, პატარა და არაფრისმთქმელი ყოფილა ჩემი სახლი, მაგრამ მაინც მიყვარს, შიგნით ვცხოვრობდი, შენც ცხოვრობდი ჩემს გულში, ჩემი გულიც პატარა და არაფრისმთქმელია ალბათ. გუბეში რგოლები გამოჩნდა, ტალღები საკმაოდ პატარაა. წყლის წვეთებიც პატარაა, წვიმს, ნამდვილად წვიმს, შენ კი ისევ არ ჩანხარ, ჩემი ხასიათიც არ ჩანს. წვიმა დაბრუნდა, მაგრამ ისევ წასვლას აპირებს, მეც ალბათ წავყვები, მიყვარს წვიმა...