უჯრაგაღებულ შავ მაგიდაზე
გაყვითლებულა თეთრი ფურცლები...
ქარმა მოპარა სახლის ყრუ კედლებს
მიტოვებული ნაზი ბგერები.

ღია ფანჯრიდან მაგიდის კიდეს
მისწვდა შხაპუნა წვიმის წვეთები.
მიტოვებული სევდა დასველდა,
უფრო გამუქდა ღია ფერები.

დაღვრილს, უკვე უფერო მელანს
თანდათანობით ერევა წყალი.
მუქმა სიბნელემ ისევ ინათა,
ფურცლები გახდა თხელი და მშრალი.

სახლის კედლებმა ძლიერ ინატრა
ბგერები, ქარის გატაცებული...
მიტოვებული სევდა გაშრა და
უფრო გაყვითლდა თეთრი ფურცლები...