მგზავრს ყველაზე დიდი რწმენა სჭირდება.
                                                                                                        სადი ნიმარი

აღმოაჩინე
მარადთეთრი კუნძული სადაც,
მონისლულია ნაპირები,
სავალი არ სჩანს.
დგას ერთად–ერთი ბროლის კოშკი,
მინავლდა ალი,
და თოვლის ქალი – სულ ირიბად მოლაპარაკე,
ქსოვს ღამეული მგზავრისთვის მაქმანს.
შენ საიდუმლო – უკანა კარით  შემოუარე,
გახელილ ფანჯრებს ააფარე ორივე ხელი,
და ხმაზე გიცნობს,
გზებით დაღლილს, გზებით გათოშილს,
და ვიდრე მკლავზე შემოგადნება,
გადმოიწერე შენს მაჯებზე
მისი თეთრი, უნაზესი ფოლიანტები...
თოვლიან მთებში
ოაზისი აღმოაჩინე!