*  *  *
ვისთვის რა არის ნაწნავი დალის
მონადირისთვის - უფსკრულთან დგომა,
პალიმფსესტებზე წაშლილი კვალიც
სიყვარულია და არა კვდომა.
მე მიყვარს! მიყვარს!
გესმის?! გეძახი!
ნუღარ დაიწყებს სხეული მტვრევას -
გადარჩენამდე! გადარჩენამდე!
ო, ღმერთო, სანამ მკვდარი მზე მოვა.
მე ვიცი ვინ ვარ, რად გეზიარე,
მაგრამ დღეს მინდა მისვლა ღმერთამდე
და დღეს სჭირდება სისხლს მოზიარე -
გადარჩენამდე! გადარჩენამდე!
აქ რძისფერია ნდომაც და მუხლიც,
ხელები ახლა მზეში კანკალებს,
მოპარული მაქვს სამყაროს შუქი
და ათინათებს შუქი პერგამენტს
... იყო ჩვენება მე თითქოს გავქრი.
სხეულში გაქრა სულის ნათელი.
სიყვარულისთვის დავბრუნდი მაშინ,
ძახილი იყო ჩემი სახელი.
...მე მიყვარს! მიყვარს! გესმის! გეძახი!
ჩვენ ხომ გვასწავლეს უფსკრულთან დგომა.
პალიმფსესტებზე წაშლილი კვალიც
სიყვარულია და არა კვდომა.