"რით ვერ გაიგეთ, რომ
ჩემი ღარიბული ტანსაცმლით,
მოუწყობელი ბინით
და ცუდი ხასიათით
თავს ვიცავ თქვენგან..."
                                ბადრი გუგუშვილი

თავს ვიცავ თქვენგან, საკუთარში მუდმივ წრიალით.
ჰო, პრინციპულად არ გავდივარ გარეთ თავიდან.
გარეთ იმდენი და იმ ფერის დროშა ფრიალებს,
მათ ყურებაში ეს ცხოვრებაც თითქმის გავიდა...
თავს ვიცავ თქვენგან, სულ ვიღაცის ”პროვ და ისტებო”,
დეჟა-ვიუა, ქრონიკული ოცი წელია.
ფეხზე მკიდია ხმას ვის ანდა რატომ მისცემენ,
და გოშიებად რომელ ბატონს  გაუწვებიან...
უსამართლობის სამართებლით ”წვერებს” პარსავენ
ყველა იმ ცნებას, შესრულება რომ არ ეღირსა...
ჩაგახუტებენ დიდ სიცრუეს ღვიძლი ძმასავით,
უნდა ირწმუნო, რომ პირმშოა დედიშენისა...
თავს ვიცავ თქვენგან, ხმას არ ვიღებ, არ ვაპროტესტებ,
ამოვულესე საკუთარ თავს ღრიჭო-ნაპრალი.
სხვამ "გიგალობოთ", მე არ ვმღერი თქვენს ყალბ ნოტებზე,
ჩემს მოცვლილ კბილებს გავატანე ყველა ზღაპარი...
მხოლოდ სიზმარში თუ ვიშუშებ უსამშობლობას,
ამ ქვეყანაზე სიზმარიღა დარჩა ჩემი და...
ჩემი თავიდან მაშინ გავალ, როცა დრო მოვა
და ვიღიღინებ თავის უფლად გადარჩენისას!..
                    04.09.12