ნუუ... მოკლედ. კაცმა რომ თქვას, ყველაფერი ისეა როგორც მინდა მეთქი, ეგ ტყუილი იქნება..

ჯერ ერთი, თავი მისკდება ძალიან მაგრად. მერე მეორეც ამ ყველაფრის გამო (მიზეზებს არ დავწერ) დეპრესია ავიკიდე მე მგონი და ჰიპი ქალი ემოდ (გლეხურად იმოდ) გადავიქცევი მალე.

ჰო აი ახლა გამახსენდა, რომ სამშაბათს თურქულში კოლოკვიუმი მაქვს და უფრო ამეშალა ნერვები. კიდე ის გამახსენდა, რომ ხვალ რეპეტიცია მაქვს და მაგრად მეზარება არა იმიტომ, რომ არ მინდა, არამედ იმიტომ, რომ როგორც უკვე აღვნიშნე - მე სამუდამო დეპრესია ავიკიდე.



მოდით ახლა ჩავატარებ აღრიცვას და ვინც არის მიპასუხოს "ვარ"

სიცივე - ვარ
ტკივილი - ვარ
ღამე - ვარ
მარტოობა - ვარ
ცრემლი - ვარ
ყვირილი - ვარ
გოდება - ვარ
მოლოდინი - ვარ
იმედგაცრუება - ვარ
კიდევ ერთი დღე - ვარ

კარგია, კარგი დასწრებაა.... ახლა ვინ არ არის:

იები - დაჭკნნენ მასწ.
სიყვარული - ავად გახდა მასწ.
სითბო - გაციებულია
ყურადღება - ოოო ეგ ისეთი დაბნეულია, ალბათ მისამართი შეეშალა და სხვასთან წავიდა
ამბიცია - მაგას სძინავს
ერთად ყოფნა - მაგათმა იჩხუბეს და დასინიაკებულები საავადმყოფოში წაიყვანეს, მასწ!

კარგით.. არაუშავს.. აბა, რა გვაქვს დღეს გაკვეთილად?

- ბიძია ზეროს რომ ატლანტიდიდან წერილი მოუვიდა, იქ გავჩერდით, მასწ!
- მას, რა წერია იმ წერილში?
- მართლა გიჟია ბიძია ზერო?
- ზერო თუ სიცარიელეს და ნულს ნიშნავს, მასწ, მაშინ რატომ დაარქვეს მისმა მშობლებმა ასეთი სახელი, ჰა, მაასწ?!


ბავშები კითხვას მისვამენ. მე კი არ ვიცი რა ვუპასუხო ჩემი დაუმთავრებელი ნოველის შესახებ....

- მას! მას! მას! ეხლა სიყვარულმა დამიმესიჯა, ისაო.. საბუთები გადამაქვს სკოლიდანო და მერე შემოგივლით დაგემშვიდობებით ყველასო და ისაო.. მასწი მომიკითხეოო...


ერთი...
ორი...
სამი....

(გუდოკი)