ყელზე შემოხვეულ კრიალოსანს
თავი მივანდე და დავეკიდე,
როცა მომაშორე მაჯებიდან
ხელის მოცახცახე სამაჯური.
ვეღარც ატირება ვინამუსე,
შენი თვალებივით მომერიდა,
მერე სიცოცხლიდან გავედი და
შენი უარყოფა დავიჯერე.

შენ კი გადაწყვიტე გამოყოფა
დროდან...რთულია და უხერხული.
სკალას დანაყოფი არ ეყოფა
შენი ამბიციის ასაზომად,
სისხლი მისრიალებს გამყიფებულ
ძარღვში,შემთბარი და უხერხემლო,
როცა თვალებიდან იღიმება
ღმერთზე დახატული მონაზონი.

როცა გადავწყვიტე ზიარება
რაღა უშენობა ავიჩემე,
რაღად ავითალე საზიანოდ
ყელში ამოსული განაჩენი.
მხოლოდ ერთად ერთხელ დამიცავი,
მხოლოდ ერთადერთხელ დამიჯერე
თუკი დაგეკიდე უსიამოდ
გულზე,დადექი და ამოჭერი.