ლულას, როგორც წესი, წმენდენ ნადირობის
შემდეგ...
ტირილისას სული იწმინდება...
გუშინ მეგონა, რომ საზღვრებს გავიდოდი,
დღეს კი უსათუოდ
ჩემი სიწმინდე ხარ...

გზები? -
არეული მთვრალის გონებაა,
ახლაც წვალებაა მგონი ლექსის წერა,
როცა ცხვარის ტყავში ვახვევ მონობას და
მერე შენთან ერთად ფრენა მესიზმრება..

და ეს ორი დღეა, არ ვარ კონტრასტული...
რაღაც ამეხირა Roger Waters-ი და
ალბათ ციხის ნაცვლად
წავალ მონასტერში...
ალბათ შენზე მეტად
მიყვარს პოეზია...

შენ კი როგორც ღმერთი,
ახლა ისე მწამხარ,
გადის დღეები და
წლები პრომეთეა...
სულის ოთახებში,
როგორც ცეცხლის დამღა
რჩება ამ ცხოვრების
ტრაგი-კომედია...

ღამეს სუნი ასდის
მსგავსი ხვალის აკვნის...
მარტო ნეკნი არა,
ჩემი ლავიწიც ხარ!..
ზეცას სანადირო თოფით შემოვაკვდი,
გაგიკვირდება და
თოფი მე გავწმინდე!..

29.X - 30.X        2013