გაშეშდებიან ჩემს თვალებში არეკლილი შენი მთები
და
ჩაქვავდებიან თვალის გუგებში
ანარეკლ ზღვაში
არეკლილ ცაზე
ჩამავალი მზით შეფაკლული შენი ღრუბლები.
არ დავბრუნდები.
ვერასოდეს ვერ დავბრუნდები.
ჩემთან ერთად კი, სამწუხაროდ შენც დასრულდები.
ჩემს თვალში მაინც.
იქნებ ვერც იგრძნო
იქნებ ტყუილად მწყდება გული იმაზე
რომ შეიძლება გული დაგწყვიტო ჩემი არყოფნით.
მიწისქვეშეთში სხვა თვალების ჩატანილ კადრებს
ჩემი თვალებით დანახული
შენი უბრალო სრულყოფილებაც შეემატება.