ნეტავ შეუძლიათ ხომალდებს გაყოლილ ჩიტებს სახლში დაბრუნება ?
თუ მხოლოდ ცის გზებს იმახსოვრებენ ?!
.......................
მე არა მიჭირს. ხასიათში ვყვები ამინდებს
და ვხედავ, როგორ ათენდება ლოგინს შენს მხარეს.
ცარიელს, მაგრამ შევეგუე, უკვე გავიგე -
სიცარიელე მთელი ჩემი,
ანუ შენ ხარ ეს!

შენ არა გიჭირს. დილაობით დადიხარ ახლაც,
შენთვის ჩვეულად, ანუ ისევ დედიშობილა
და კაცნაკლული, მხოლოდ შენით ცოცხალი სახლი,
გრძნობს, რომ სიჩუმე
უსახლობის მსგავსი ყოფილა.

ჩვენ არა გვიჭირს. სიბნელეში თვალებს არ ვხუჭავთ,
რადგან ისედაც სიბნელეა და რა აზრი აქვს,
რომ ჩაძინების წინ ვიხსენებთ დღეებს ნაქურდალს
და ამ ნაბიჯით,
სახიფათოდ, ვარღვევთ შარიათს.
......................
ნეტავ შეუძლიათ ხომალდებს გაყოლილ ჩიტებს სახლში დაბრუნება?
თუ მხოლოდ ცის გზებს იმახსოვრებენ ?!