ნაწვიმარია მთელი კიოტო.
ამ დრომდე ისევ სძინავთ გეიშებს
და განსხვავება არის იოტის,
ვინმე შეგიშვებს,
თუ არ შეგიშვებს,
სახლში, რომელშიც არის არა რა,
გარდა მტვრისა
და გარდა საკესი.
ხარ სასიკვდილო გრძნობის ამარა
და მოლოდინი გაქვს უარესის.
შენი ფანჯრის წინ, ყვითელ ნარცისებს,
წვიმა არხევს და ნერვებს აცოფებს.
მე სევდა დამაქვს, ისეთ კაცისებრ,
დედას რომ შვილის სიკვდილს აცნობებს.
.........................
მთელი კიოტო ნაწვიმარია.
სძინავთ ნატიფებს და სძინავთ შიშვლებს.
რა სათქმელი და მოსატანია,
მაგრამ უხდებათ წვიმა გეიშებს.