ნინო დარბაისელი

რატოა ასე
- -
დილავ, მითხარი, რატოა ასე? -
საკუთარ სიკვდილს ყველაზე გვიან იგებენ მკვდრები,
არ იჯერებენ,
რომ ამქვეყნად აღარ არიან,
რამდენიც გინდა,
დაბეჯითებით უმეორო:

- მამა, მე ბავშვი აღარა ვარ,
შენ კი უკვე  ამ ათი წლის წინ გარდაიცვალე.
საბურთალოზე,
შესასვლელში,
ეკლესიასთან,
სადაც წყვილი კიპარისია,
ოდნავ - მარცხნივ
არის შენი კენტი საფლავი
და ზედ  რუხი გრანიტი ადევს.

2010