ჯონ კიტსი - დღე დამთავრდა

დღე დამთავრდა და წაიყოლა ყველა სიამე,
ტკბილი ხმა, ბაგე, მკერდი, ხელი, თმა დახვეული,
სუნთქვა, ჩურჩული... შუქ-ჩრდილებიც შთანთქა სიღამემ,
აგრეთვე თვალი, დუნე წელი, სარო სხეული. 

დაჭკნა ყვავილი და გაუქრა  მას სიმაისე,
თვალს მიეფარა სახილველი გულმოსაოხი,
მშვენიერებას ხვევნით ვეღარ გავითავისებ,
გაქრა ხმა, სითბო, სიქათქათე, ბაღი სამოთხის.   

გაქრა უდროოდ ყველაფერი, მწუხრის ზადიკმა
მისი ადგილი წმინდა ღამეს როცა დაუთმო,
სალაფარდებით არემარემ თალხი გადიკრა,
სასიყვარულოდ მოამზადა  გზნებით საწუთრო.

რამეთუ დღეის სატრფიალო წარვთქვი ლოცვები,
მწამს, გამიხდება სანუგეშო ძილის მომცემი.

31 ოქტომბერი, 2022 წ.       


ორიგინალი იხილეთ აქ: https://www.poetryfoundation.org/poems/50374/the-day-is-gone-and-all-its-sweets-are-gone