#ლექსები

ნდს

ჯეკ დენიელსი. სიყვარული

“ჯექ დენიელსის” მოკუთხულ  ბოთლში ასხია ვისკი,
ვის სულ  არ უყვარს,
ვის კი  გული აუხტუნდება,
ვიდრე  ყინულებს  ბარისტერი
გამჭვირვალე და განიერ  ჭიქაში ჩაჰყრის,
მერე დაასხამს სოდას და ბოლოს
ჩაამატებს  ერთ “შოთ” ალკოჰოლს.

შენ შეგიძლია,
ჭიქა ბარის თავზე დატოვო,
მაგრამ თუ წრუპავ - გეამება
ჯერ ენის წვერით,
მერე ხორხით
და კუჭის წვერით გაეღები,
იგრძნობ,
ბჟუილით  როგორ გეხსნება სისხლძარღვები,
ფეხის თითებშიც როგორ დაგივლის,
გულიც და ენაც მიგიბუჟდება
და გეგონება, ფეხსაც აღარ  დაისველებ,
სულ ერთიანად გადაუვლი  ყოფიერ ამბებს, 
დარდს თუ პრობლემას.

მისაყოლებელს რას გირჩევდი?!
მისაყოლებლად ვისკის უხდება ერთადერთი -
მეორე ჭიქა!
ხოლო იმას - მესამე და  უკვე მზადა ხარ!
ტაქსი მიგიყვანს მისამართზე.

და კიდევ ერთი,
ბარში მშიერი არ შეხვიდე,
რაღაცეები კი ექნებათ,
შიმშილს აოკებს, სასმელს კი მაინც არ უხდება!
თუ სვამ,  ნაჭამმა უნდა დალიო!
დილას კი მაინც თავის ტკივილით გაგეღვიძება!

და სიყვარულიც  - ზუსტად ასეა,
უმჯობესია, 
დილას  მარტოს  გამოგეღვიძოს,
თორემ გვერდით მწოლს რომ გადახედავ,
აუ, ამას აქ რა უნდაო,
- გაგეფიქრება,
ნეტა რა იყო,
როგორ იყოო,
გვერდით რატომ გადაბრუნდაო…

ჰო სიყვარული -
მუდამ რისკია,
სოდა-ყინულით გაზავებული ჭიქა ვისკია,  ყინულჩამდნარი,
ასე,  ბარის თავზე იდება,
და თუ არ დალევ,
არც არაფერი მოგეკიდება.
აღარ მოგიწევს არავისი არც აკიდება,
არც არავისთან გადაკიდება…

ერთიც დამისხით!