#ლექსები

ნინო დარბაისელი

გულის კინცუგი*

თუ ვინმეს ოქროს გული დასჭირდეს,
გამოაგზავნეთ ჩემთან.
გული მაქვს ბევრჯერ გატეხილი და
მცოდნე ვარ განაჩენთა.

იმდენჯერ დამკრეს დაუნანებლად,
მახვილიც ისე ურჭეს!
მსურდა სიცოცხლე და აღვიდგენდი,
ვით იაპონურ ჭურჭელს.

ნატეხებშუა გაჩენილ ღრიჭოს -
ფიქრის ოქროთი ვკრავდი,
და თუ დამაკლდა მთელი ნატეხი,
- შევავსე ხელის კვრამდი.

ყოფილა ასეც, სხვა გულგატეხილს
ურგო ნატეხებს ვთხოვდი,
და ვამცირებდი იმათით მანძილს
ჩემში “არა”- დან “ ჰო”- მდი.

არ მემუქრება აღარაფერი,
კიდეც რომ ვიბობოქრო!
ვერცხლს და პლატინას რაკი ვერიდე,
მკერდში მიფეთქავს ოქრო!

ოქროსგულიანს ვინ მომერევა,
ვინ რას დააკლებს მეტალს!
ჩემს გულს დაეძებთ? აჰა, ოღონდაც,
რა შავ ქვად გინდათ, ნეტა!

- - -
* კინცუგი - გატეხილი ჭურჭლის ძვირფასი მეტალით გამრთელების იაპონური ხელოვნება. ლექსში გამოყენებულია სამივე მეთოდი.