სხვისი რომ ამდენი სონეტი მენახა,  თუ არ ვიტყოდი, გავიფიქრებდი მაინც, რას გადაეკიდა ამ  შექსპირულ სონეტებს, რით ვერ იჯერა გული- მეთქი.
საქმე კი ასეა.
დავთვალე და  აღმოვაჩინე, რომ ასს მივუკაკუნე.
ჰოდა, გადავწყვიტე, გავაასო!
თან აქედან 27+ 35=62 უკვე ბეჭდურად მაქვს გამოქვეყნებული.
დანარჩენები - ჯერ გამომცემელს ელის.
ისე როგორ ჟღერს?-
“ასი შექსპირული სონეტი”

#ლექსი

ნინო დარბაისელი

განათების ხელოვნება
(სონეტი)

მაშინ მუშაობს - განათება  -
როდესაც ბნელა.
რა ქროლვა გინდა, რაში გინდა?
რამ დაგანელა?

ლექსს- პოეზიად ქმნის სათქმელი,
ისიც ასეა.
უსათქმელობას შველის  მქმნელი?
ის, ვინც ცაზეა?

და თუ სათქმელი მოგესია,
არ დაგეტია,
მაშინ  დუმილის პოეზია
იქნებ  მეტია?

უგანათებოდ  - გაჩერებს აქ - რა!
…და შუქიც  ჩაქრა!