ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე.     * * *     დიდება უკრაინას !!! Сла́ва Украї́ні !!!

ავტორი: ციცანა/გვანცა ჯობავა
ჟანრი: პოეზია
6 ივნისი, 2008


შენთან დარჩენა არც მიფიქრია...

მე ყოველ ღამე მოვდიოდი შენთან,
მომქონდა ვარსკვლავების ფერადოვნება,
ყელზე მეკიდა მძივად ასხმული,
ჩემი ლოცვების ჰაეროვნება.

მე ყოველ ღამე გჩუქნიდი ამ მძივს,
და ყოველ დილით გიქმნიდი ახალს,
თხელი თითებით ვეფერებოდი
ჩემი ლოცვების სევდიან ასხმას.

ფართოდ ვაღებდი გულის დარაბებს,
ბოქლომს ვტოვებდი საწოლის თავთან,
გახსნილი გულით შენთან მომქონდა
სუფთა გრძნობების ვულკანი, თავსხმა...

და არ იცოდი, რომ შენთან მოსულს
მე კარის ზღურბლთან მიცდიდა ქრისტე,
მე ვთხოვდი, ღამით შენ გამომყევი
შემეშინდება მარტოკას ისე...

სჩანს, არ იცოდი, რომ არც ერთ ღამეს
შენთან დარჩენა არც მიფიქრია,
მე ხომ კარებთან მიცდიდა ქრისტე,
ვისთვისაც სული ბრმად მიმიძღვნია.

გთხოვ, ნუ დამწამებ დღეიდან ღალატს,
შენთან დარჩენა არ შემიძლია.
მე კართან მიცდის მშობელი - ქრისტე,
ეს სული შენთვის არ შეუქმნია.

კომენტარები ილუსტრაციები რეცენზიები