ბარემ აქაც დავწერ:

26 ივნისს, მზიურში, საღამოს 18:00 საათზე
გელით ყველას უკვე ტრადიციულ ხევსურულ საღამოზე თბილისში
შედგება თეონა ქუმსიაშვილის დისკის პრეზენტაციაც



ლეგეგენდებიდან წამოწეულნი
ამაყად ვუმზერთ აწმყოს
და თავს ვარიდებთ მომავალს
სადაც ლეგენდები აღარ ვიქნებით.

შენარჩუნებული ნამუსით,
ვზივართ ჩვენსმიერვე აგებულ კოშკებში
და ფუნქციადაკარგული სათუფურებიდან ვიმზირებით,
ჰორიზონტი სუფთაა,
ცა კამკამა,
მდინარე ამაყი,
მთა კი ბუმბერაზი.

...სიჩუმეა...

სრული იდილია დროგამოშვებით ირღვევა
ქარაფებიდან მოწყვეტილ ზვავთა ხმაურით,
ხმაურით, რომელიც სადღაც ჩვენს გვერდზე წყდება
და მოწყვეტილ სამყაროსთან კიდევ უფრო გვაუცხოებს.

ჰორიზონტი სუფთაა,
ცა კამკამა,
მდინარე ამაყი,
მთა - თეთრი ბუმბერაზი.
სიჩუმეა,მარტოსულობა...
და ჩვენც
ჩვენივე ქარაფებს მოწყვეტილნი
ბარისკენ მივქრით
ზვავებივით ფეხარევით,
უკან ყურებით,
კვალის ტოვებით.

ლეგეგენდებიდან წამოწეულნი
ამაყად ვუმზერთ აწმყოს
და ჩუმი შიშით ველით მომავალს
სადაც ლეგენდები აღარ ვიქნებით.

...სიჩუმეა, მარტოსულობა...
მთა კი თეთრი ბუმბერაზი.