ეშმაკმა გესლით ამივსო კათხა,
დღეს ნისიაზე ვუღიმი ბარმენს...
მერე უშვერი სიტყვებით მთათხა,
მუზებმა ჩუმად გადმომითარგმნეს:
ასე უფულოდ როდემდე ივლი,
დათვალეს ბოღმა აგერ ჰერცებად,
კანი ეჩვევა მხურვალე ივლისს,
კანი, რომელიც აგექერცლება...
მე დღესაც უნდა მივიღო რუჯი,
ხელები ვინმე მიმივით ვმართო,
ცაა ისეთი ფართო და ლურჯი,
ცაა ისეთი ლურჯი და ფართო,
მე მიხარია სტრიქონის რანდვა
და უძილობას არ ვგმობ სრულებით,
შენ რომ დამტოვე მე სწორედ მანდ ვარ
და ვიცი სხვაგან არც გეგულები..
ფილტვებს ვიგლოვებ ყვითელი ფილტრით,
ლოგინზე ვხდები დასაბამი და...
...დასაბამიდან მიწისკენ ვილტვით,
მიწა რომ გავხდეთ დასაბამიდან.