დილით,როცა იღვიძებ და ძველ სიზმარს მისტირი,
მაშინ შუა ძილშია საქმიანი მისტერი,
დილით ყავას მიირთმევ და აყოლებ პაპიროსს,
თეთრი კვამლი ამოდის,კვდება რომის პაპი როს...
სხეულზე გეტმასნება შენ ერთგული ხალათი,
ხანაც დილის ცხრა არის,დილის არის ხან ათი.
გეზარება გამოცვლა,მაგრამ გიცდის ოფისი,
იცი,ამ სიცივეში ნეკერჩხალსაც რომ ფისი
შემოაკვდა ისევე,როგორც ტუჩებს სინაზე,
ღამე ღამის მოსვლამდე კვალს გიტოვებს მინაზე.
რუხი აბაზანიდან შენი პრანჭვის ხმა ისმის,
რა შორსაა ხელფასი და ნირვანა მაისის,
რა შორსაა იგი,ვინც გინდა გყავდეს ახლოში,
მაგრამ თვითონ გარიყე უცხო სამოსახლოში.
დილით,როცა იღვიძებ და ძველ სიზმარს მისტირი,
უცხო სამოსახლოში ძილში ბორგავს მისტერი