არაფერს ტოვებენ ნაბიჯები,
მხოლოდ ფეხს იცვლიან,
ალბათ, მინდოდა და დავიჯერე,
რომ წლების სივრციდან
შერჩენილ შეგრძნებებს მოვაყოლე
ფერადი სიზმრები,
სულ ტყუილია და მონაჭორი,
რომ, თითქოს, ვიზრდებით,
რომ, თურმე, ბავშვობის ოცნებები
დროდადრო ქრებიან,
თვალებიც ნაკლებად ოცდებიან,
ერევათ ფიქრები.
ჰორიზონტს ტოვებენ მეწამული
მზის ბოლო ლაქები,
თავსაც სხვანაირად აწონებენ
სხივები, აქებენ...
რა გაუსაძლისი სიშორეა,
როდესაც არ ელი,
(ყინვაში დამფრთხალი შაშვებივით)
სურვილებს - გაფრენილს.
რა მიამიტივით დავიჯერე,
რომ ფრენა ხიბლია.

ვერაფერს აღწევენ გაგიჟებით,
მხოლოდ ფრთებს იღლიან.