ხმადაბლა უსტვენს ქარი ნოემბრის,
სევდისპირულზე თვლემენ ქუჩები.
მოეწურება ფერი დროებით
ამინდს, სიცივით დამსკდარ ტუჩებზე.
ჩამოარიგებს ქარი ფოთლების
ყვითელ წერილებს, ჯერწაუკითხავს.
სევდიან მოტივს ზამთრის მოთმენის
კვლავ უსტვენს ქარი ქუჩის კუთხიდან.

თოვლის გრაფიკა

თოვლმა ქუჩები ისევ გაცრიცა,
დილა ფინჯანში მღვრიე ცას მისხამს.
ადნება ფიქრი სარკმელს ნაფიფქარს
და თოვლის სევდა თეთრი ძაფით მკლავს.
თოვლი კი ხატავს შავ-თეთრ გრაფიკას,
თებერვლის პორტრეტს - ცივ და ნატიფ ქალს.
წუხს თებერვალი ბოლოს ნაკიანს,
ქარმა ქუჩებში უკვე გაკიდა
შავ-თეთრი ტილო თოვლის გრაფიკის,
ზამთრის სულ ბოლო პარაგრაფიდან.