სულ ერთი წამით დავტოვებ მიწას,
მზესთან მივიფრენ სულ ერთი წამით,
სულ ერთადერთხელ ავიხდენ სიზმარს,
საზღვრებს შენამდე ამ ერთხელ წავშლი.
ამ ერთხელ ვიტყვი ჯერ–უთქმელ სიტყვას,
ერთხელ ვიცეკვებ ვალსს შენთან ბალზე,
რაც უნდა იყოს, რაც უნდა ითქვას,
აღარ დავუთვლი სიცოცხლეს წამებს.
ამ ერთხელ შენთან სიზმარში მოვალ,
სულ ერთი წამით დავკარგავ კდემას,
ცა ფერადია ამგვარად როცა,
ერთი წამიც და... მე ვიწყებ ფრენას.