ჩურჩხელა

                            ჩვენს დიდ ქვაბში, ქარვისფრად
                            ათუხთუხდა თათარა,
                            ჯარასავით ტრიალებს
                            ცეცხლთან ბებო ჭაღარა.
                            მსუქან-მსუქან ჩურჩხელებს
                            ვეღარ იტევს ხარიხა,
                            ონავრების ყიჟინა
                            მთელ სოფელში დაირხა.
                            ამბორს უყოფს ბავშვებს მზე,
                            ზეცის ლურჯი თაღიდან.



                                                          ცისატრყელა

                                      ცისარტყელა  როცა  სარტყლად
                                      შემოევლო ზეცას,
                                      პაწაწუნა, ანცმა ბარტყმა
                                      უხმო დედა მერცხალს.
                                      თან შეპარვით, მოფერებით
                                      სთხოვა;- ჩემო დედა,
                                      შენს ლამაზ ბიჭს  ჭრელა-ჭრულა
                                      უფრო მოუხდება.
                                      დავარღვიოთ ცისარტყელა
                                      და შვიდივე ფერით,
                                      მომიქსოვე სამოსელი-
                                      ჩემი შესაფერი.
                                      გაწყრა დედა, გაიმკაცრა
                                      ხმა;-რა გითხარ  გუშინ?
                                      მერცხალი ხარ, თუ ცანცარა
                                      ყბედი თუთიყუში?
                                      მამაპაპურს შეელევი,
                                      არ გრცხვენია, განა?
                                      სულ ტყუილად მიმღერია
                                      შენთვის ,,იავნანა''!
                                      შერცხვა ბარტყს და გაილურსა,
                                        დედას ჩაეხუტა...
                                        ასე იყო ეს ამბავი,
                                        ჩემო ცოტნე, უტა...
                                        ცისარტყელამ კი...გაიგო
                                        ეს და  გაიბუტა.


                                                      ძერა

                                      ძერა ძნაზე შემომჯდარა,
                                      უთვალთვალებს საკბილოს,
                                      წიწილები იხმო კრუხმა,
                                      სურს, რომ მოეთათბიროს.
                               
                                        პატარების ონავრობამ
                                        გააყრუა მიდამო,
                                      -ჩვენ თამაში გვინდა, დედა,
                                        ძერაზე სხვამ იდარდოს!

                                        გაიფანტნენ, მშობლის რჩევა
                                        არ ისმინეს ურჩებმა,
                                        -თქვენ რას მეტყვით, მგელს, თავკერძა
                                        კვიცი, გადაურჩება?