მითხარი რაც გინდა, ოღონდ თქვი რამე.
ის რაც პირველი მოგადგება ენაზე, გონზე.
ნუ დადგები ოღონდაც გულქვა არყოფნასავით.
ამოირჩიე რაიმე სიტყვა, – წერე ან შობე.
ამოირჩიე თუნდაც სიტყვა
რომელიც უფრო დიდ ბუნდოვანებას
შემოიტანს ჩემს გონებაში.
სიტყვა, რომელზეც ვიფიქრებ
დღეები და აზრს ვერ გავუგებ.
ვერ მოვუძებნი რომელი მხრიდან უნდა მოვუარო,
რომელი მხრიდან უნდა მოვერგო
ან მოვირგო..

ოღონდაც ნუ ხარ როგორც არ ყოფნა,
როგორც დუმილი – სიცარიელე.
რა გემართება შენ მაინც რა,
მითხარი რამე,
ხომ ხედავ ყოფას მიცარიელებ.

მითხარი,რომ „კლდეა ჩვენს წინ“
მელაპარაკე მის წარმოშობაზე,
ქვებზე,
ქანებზე,
ბუნებაზე,
კატაკლიზმებზე.

მითხარი,რომ:
“იქ, სადაც ჩვენ ვმთავრდებით,
იწყება გზა.“
გზა, რომელიც იყოფა კლდით
და სხვადასხვა მხარეს მიემართება.
მითხარი,რომ ჩვენ ვართ ორი გზა,
რომელიც არასოდეს კვეთდა ერთმანეთს.
მითხარი,რომ არსებობს გზები რომლებიც არასოდეს ხვდებიან.
არსებობს ქუჩები, რომლებმაც ერთმანეთის არსებობაც არ იციან,
არსებობენ ქუჩებზე ხეები,
გაჩერებები,
კორპუსები,
მაღაზიები,
ნაგვის ბუნკერები
და ყველა მათგანს ჰგონია რომ უნიკალური და ერთადერთია.

მითხარი, რომ
  ”დრო არასდროს დგას.“
მითხარი,რომ ჩვენ ვართ დრო
და ვერ ვიდგებით,
მითუმეტეს ვერ ვიდგებით ერთად
იმიტომ რომ  დედამიწის სხვადასხვა პოლუსზე ვართ
და სხვადასხვა დროს ვაჩვენებთ.

მითხარი – „ერთი“,
მერე მითხარი, რომ შენ ერთი ხარ.
და რომ ერთი არ იყოფა ორზე
(ჩემზე და შენზე)..

მარტივი არითმეტიკა.
მათემატიკა.
ალგებრა.
გეომეტრია.
პითაგორის თეორემა.
ისიც მითხარი, რომ
თეორემის თანახმად,
რისი დამტკიცებაც გვინდოდა,
ის შეუძლებელია..