ფიქრის ბუხართან ვზივარ და ვთბები,
მოცარტს ”აწვალებს”  მეზობლის გოგო.
შენი თითები მინდა ჩემს თმებში,
განწყობას უცებ აღმოხდა - ოჰო!..

რაღაც მაცდურად მიღიმის ღამე,
ვგონებ, გუნებაც რაღაცნაირობს...
მეზობლის სახლში ნაძვის ხეს დგამენ,
ისე ხმამაღლა, მე რომ გავიგო...

ორაზროვანი მზერა აქვს ჭაღსაც,
რაღაც მოხდება, ბოლთას ცემს გრძნობა...
კაი და... ჩემი სურვილი ახდა?
არ ვიცი როდის, ვიცი რომ მოვა...

ღამე გარშემო უჩუმრად მივლის,
მოლოდინს იხშობს თითების ფშვნეტით.
გულისპირს კაბამ შეიხსნა ღილი,
რატომ? რომ მოხვალ, ჩურჩულით გეტყვი...

ცხელი ალმური მოედო ყვრიმალს,
რაღა თქმა უნდა, მთლად სისხლისფერი.
ფანჯრებზე პეპლებს ხატავდა ყინვა,
ჩემზე მთრთოლვარე, ნატიფი ხელით...

და უცებ, შავი კაშნეთი დენდი
მომიახლოვდა იმდენად ახლოს...
ჩემ კედლის იქით უკრავდა ბენდი,
და თუ რამ მოხდა, ჭერს ჰკითხეთ, ახსოვს...