აღარ ვწვავ, აღარ ვწვავ, გულის ცხელ ტაფაზე
ერბოკვერცხს ”ოფ-ოფ”-ით!
არც გამანაწყენე და არც გამაბრაზე,
თოთო გაქვს ფოთოლი!..
ასაკს მყვირალობის ვიცი, რომ ახლავს თან
ურჩი მცდელობები.
არ ღირს ბოდიალი ამ სულის გადაღმა,
მე არ გელოდები!
ვეჭვობ, რომ დამთავრდა ერთობ ვერბალური
კატა-თაგვობანა.
გავერთე ერთგვარად, უწყინარ-ქალურად,
გული არ ბორგავდა...
ოქროსფერ გოგრაში შებმულ თაგვს მაგონებ,
”აჭენებ” კარეტას.
ღამე ყველა კატა რუხია, მე მგონი,
ასე ჩანს გარედან...
წერტილებს არასდროს ვამრავალწერტილებ,
მორჩა და გათავდა!
ნუღარ გამოგზავნი ცხელშუბლა წერილებს
”სიამის” კატასთან...
    04.01.12

* * *
გაცვეთილ გარსს იძრობ,
უფრო ნამდვილი ხარ.
ხსოვნის მასპინძლობა
არც თუ ადვილია.
საკვამურს ცად მიაქვს
სახლის გულნათხრობი.
ბედს სულ არ სცალია,
გისრულოს, რაც სთხოვე...
გიცინის სარკეში
შენი ორეული.
დარდი გყავს ასკეტი,
გრძნობა კი გრძნეული...
დრო და დრო გული ფენს
გულნადებს ურითმოდ.
რაც თავს გაუფიქრე,
არ არის ურიგო.
თითქოს და დროს ჩრდილავს
ხსოვნიდან ეს ფირი.
ვისკის ვსამ სკოტჩით და...
მიღიმის  შექსპირი...