ალბათ იმიტომ დაარქვეს მახარე პირველი შვილი რომ იყო. ამბობენ კარგად სწავლობდაო, კარგი ბიჭი იყოო. ახლაც არაფერს აშავებს, მაგრამ რატომღაც ყველა გაურბის, ყველას ეშინია.
მაღალია მახარე, წვერს ატარებს და მაღალყელიან რეზინის ჩექმას. ორი შარვალი აქვს, ორივე - მუხლზე დაკემსილი. გასულ წელს მოუკვდა დედა მახარეს. მარტო დარჩა.  ბევრს სვამს და სასაფლაოზე სძინავს წლებია. სხვანაირი მახარე არავის ახსოვს.
ბევრ ამბავს ჰყვებიან... იმასაც ამბობენ, მახარეს მეგობარიო მატარებელმა გაიტანა, ცხედარი თავის ხელით მიიტანაო სახლამდე. ისიც გამიგია, ცოლი ჰყავდაო ულამაზესი, სხვა შეჰყვარებია და მახარე მოუწამლავს, იმის მერე აურიაო. ბავშვობაში გვაშინებდნენ ხოლმე თუ არ დაიძნებთ მახარე მოვა და წაგიყვანსო.
არაფერს აშავებს, დადის და „პრიმას“ ეწევა. თავის თავი დააქვს და დადის.
გუშინ დარეკეს სოფლიდან, სამი დღეა აღარ გამოჩენილაო მახარე.