აცეკვებს წვიმას ქარის შოლტები,
დაიფრენს ღრუბლებს უბირს და უნდილს,
მამის თბილ ტახტზე გავიშოტები,
ცა იმოსს მთვარის სხივნაქსოვ მუნდირს.
        დღეც ჩემთან ერთად ღონემიხდილი...
        შორს ჩამომქრალი ცის ლიცლიცია,
        მერევა თვლემა _ მცირე სიკვდილის
        იწყება უხმო რეპეტიცია.
არყოფნა ...  სული დამდგარა ზღვართან,
ხეებს ფოთლები სცვივა უძალო,
არც ისე ძნელი ყოფილა წასვლა,
მტრედების ფრთების ქოხში, უფალო...