###
მე ყოველ დილით
ფანჯრებს ვაღებ ჩემი ოთახის.
ჩემი მეზობლები წუხდებიან,
ყოველ დილით ჩემი ოთახიდან
გადის სიჩუმის ხმა.

###
ერთხელ ციგნის ბავშვს
მეტროსადგურში,
ვიღაც გამვლელმა დედის
თვალწინ, უპატრონოო უთხრა.
მახსოვს დედამ როგორ ჩაყლაპა ცრემლი.

###
გუშინ ბერიკაცს ვესაუბრებოდი
ათას რამეზე,
და წამიერად ისე ჩაფიქრდა,
ღმერთო შემინდე, დავინახე
როგორ ქმნიდი სამყაროს.

###
ოთახში, სადაც ჩვენ ორნი
ვიყავით,
გაზაფხულის სურნელი დატრიალდა,
მას შემდეგ, რაც შენი თითები
ჩემს ხვეულ თმაში აყვავილდნენ.

###
გუშინ ქუჩის მუსიკოსებს
ჩავუარე,
ისე მღეროდნენ, მივხვდი,
სცენა ვერ გუობს დახურულ
სივრცეს.

###
ოთახის კარი ღია დამრჩა
გუშინ საღამოს,
დედამ შემოიხედა,
უმისამართოდ მიყრილ ნივთებში
ჩემი მშვიდი ძილი გაარჩია მხოლოდ.

###
გასულ წელს ახალგაზრდა
მოკვდა სოფელში.
მახსოვს ალუბლები ყვაოდნენ.
მერცხლებთან ერთად მოვიდა
იმ წელს სიკვდილი.