###

ბუხრის წინ ვზივარ.
თოვლს ახრაშუნებს ფეხებქვეშ ვიღაც.
კართან შეჩერდა. ფეხები დააბაკუნა,
თოვლი ჩამოიბერტყა. გულზე მომეშვა.
ასე მოყვარე თუ იზამს მხოლოდ.

###
მე მაშინ მივხვდი,
როგორ გართულდა
ჩემი ცხოვრება,
არაფერზე რომ დავიწყე
ფიქრი.

###
სადარბაზოში შევედი გუშინ,
უცნობი სიგარეტს ეწეოდა.
სიგარეტის წითელ წერტილზე შევჩერდი,
როგორც შუქნიშანზე,
შემდეგ ჩაქრა და გზა განვაგრძე.

###
დილით მოხუცი კვეთდა
გზატკეცილს,
წამში მივედი, ხელი ჩამჭიდა.
გზა გადავკვეთეთ,
ისევ უძლური გაუხდა ხელი.


###
ბავშვობაში მეზობლისას რაღაც
მოვიპარე. დამიჭირეს,
აღიარეო,არ ვაღიარე.
უცებ ვიგრძენი რაღაც გაწყდა,
შუბლი ამეწვა.