ემოციებს გავუზომე მაჯისცემა,
სიბერემდე სულ ორიოდ ნაბიჯზე.
ჰო,სიმშვიდე, რა თქმა უნდა,არის თემა,
თუმცა, ჩავლილ სიგიჟეებს გაფიცებ,
ჩაუტოვე ფიქრებს ხსოვნის ზარდახშაში,
მოწყვეტილი წამი - პეპლის ეფექტი!
დრო ყველაფერს უშენოდაც გადახარშავს,
გულუბრყვილო ოცნებებით  შეფეთქილს.
შევიცვალე? ალბათ ისე ძლიერ არა,
ზოგჯერ მე და ზოგჯერ სხვას რომ ჰგონია.
ქმედების წინ განსჯა უფრო მომეძალა,
დაეკარგა ფონი ეიფორიას...
ემოციებს გავუზომე მაჯისცემა,
სიბერემდე სულ ორიოდ ნაბიჯზე...
ჰო, სიმშვიდე, რა თქმა უნდა, არის თემა,
თუმც, არ ვიცი, მე როდემდე გამიძლებს...
17.09.16