დღეს, თებერვალი უკანასკნელს ხვდება ალიონს,
ლოტის ცოლივით უკან რჩება ყინვას თვალები.
წლეულს ზამთარი ისე მოკვდა, არ უწვალია,
თითქოს გვიჩვენა მაგალითი გარდაცვალების...

სულ ცოტაც, ჭიპლარს გადაჭრიან და თოთო მარტი
ტირილით გვამცნობს, რომ გაზაფხულს მოსვლა ეღირსა,
რომ შეეძინა დღეს ბუნებას გოგო - ნანატრი
და აღარ არის მომდურავი მეტად ბედისა.

მორცხვად ამოვა ია - გოგოს მახარობელი:
"მომილოცავსო" - იტყვის - "შობა მესამე შვილის!"
ელვას გაისვრის ორლულიანს შავი ღრუბელი
და წვიმით შესვამს სადღეგრძელოს ახალშობილის.