ასე ხელაღებით შეხვალ მდინარეში.
კათაკმეველივით ითხოვ ნათლისღებას.
მოათვინიერო გინდა, გილგამეში.
გინდა, მოგვახარო ,,მისი“ მუცლადღება.

ასე ხელაღებით შეხვალ მდინარეში.
იქ არც იესოა და არც იოანე.
მოლა დაიკივლებს სადღაც, მინარეთში.
არც ეს მდინარეა წმინდა იორდანე.

ასე ხელაღებით შეხვალ მდინარეში.
შენი ვითარება უკვე კოლაფსია.
უკან ვერ დაიხევ, რადგან სიამაყე
გეტყვის, ,,დაბრუნება მარცხის ტოლფასია“.

ასე ხელაღებით შეხვალ მდინარეში.
გაგცემს სამოსელი და ვერ გადაღებავ.
როგორც ავაზაკი, ისე ითარეშებ.
მერე შენდობისთვის ითხოვ ნათლისღებას.

ასე ხელაღებით შეხვალ მდინარეში.
(შენი სიამაყეც ცოდვის მორევია).
მაგრამ სამოსელი, შავი სამოსელი
უკვე მოგერია.