(ავღანურ მოტივებზე)

სულ დავიწყებია ქალი ღმერთს
ქაბულში, ტყვიების თარეშში.
როგორ სძულებიათ თალიბებს
ქალები ჩადრების გარეშე...
რჯული დავიწყნია იღბალსაც,
ცა ბუნდოვანია ჰაშიშით.
ის, რაც სიამაყით გიყვარდა,
გახდა რა ულმობლად საშიში...
ტყვიების ზუზუნმა გაბმულმა
დრო მოჭრა საკუთარ ყალიბზე.
ნარგილეს მიმჯდარა ქაბული,
ფიქრებში აპურებს ღარიბებს.
ის დილაც გათენდა ნამაზის,
ჩადრიდან ცა მოჩანს ირიბად.
თვალები უღმერთოდ ლამაზი
უხმოდ და უცრემლოდ ტირიან...
განგებას მიენდე, ინშალლაჰ!
ცა იხსნის ღრუბლების არახჩინს.
მზე შემოიხვიე თბილ შალად,
თუ კიდევ ცოცხალი გადარჩი...
ვერ აცხო მშვიდობამ ნაანი,
ვერ იქცა ავღანეთს საჰიდად!
ქაბული იმ ქვათა ხმა არი,
რომელთა დანგრევაც არ ღირდა...
05.05.20

ინშალლა - (არაბ.) ღვთის ნებით, გამოიყენება იმედის კონტექსტში.
ნაანი - თხელი პური
საჰიდ - ბატონი, მეპატრონე
არახჩინი - ნაჭრის თხელი ქუდი