მოდი,ერთად გადავცუროთ სტიქსი,
ოპიუმმაც თუ გვათხოვა თრობა,
იგრეკს ისევ მივუმატოთ იქსი
და გავლიოთ კიდევ ერთი ბზობა.
მოდი, ვარდებს დავესესხოთ სუნი,
ჩვენი სულიც გამოვტყუოთ ქარონს
და აკლდამებს ვუსახსოვროთ სული
და ტუჩები შემოაკვდეს ამბორს.
დილამ ღამეს დაუხია ფარჩა,
გული-ენით დანასერი  მეწვის
ღამეა და ცაზე მთვარე არ ჩანს,
დილაა და წინ ხიდია ბეწვის.
წყალივით ვსვამ აბსენტს-მწვანე სითხეს,
უსინათლო, კვლავ დავეძებ ოქროს...
გზა აებნათ მაწანწალა ვირთხებს,
ვეღარ ნახეს სახლი თვისი, სორო.
დაისიდან აისამდე იქნებ
მეც შევიგრძნო შენი თბილი საშო,
მე ბავშვი ვარ და ღამეულ ფიქრებს
შევეჩვიე როგორც სათამაშოს
მოდი, ერთად გავათიოთ ღამე,
თებერვალში გრძელი ღამე იცის...
ოღონდ მთხოვე, ოღონდ მთხოვე რამე
და ვარსკვლავებს მე მოვპარავ ციმციმს.
ნუ მასწავლი ოცნებას და მოცდას
და მე ღმერთებს სიცილს გამოვართმევ
და სიზიფეს ვერ ატანილ ლოდსაც,
მე შენამდე ტიტანივით ვათრევ.
ოღონდ მოდი, გადავცუროთ სტიქსი,
ოპიუმმაც თუ გვაღირსა თრობა,
იგრეკს ისევ მივუმატოთ იქსი
და არ მორჩეს სულებს შორის ტკბობა.