ნება მომეცით მოგიყვეთ
მწვანე  თახვებსა და
ხორბლისმარცვლით მიმღოღავ
ჭიანჭველებზე.
ო, ჩემი ბავშვობის ჭიანჭველები
და გენიალური თახვები
როგორ ღრღნიდნენ ჩემი საწოლის თავს.
სულ გუშინწინ, სულ გუშინწინისწინ,
სულაც ზეგ ან მაზეგ
მე გამოვუტყდი პიტერ პენს
სიყვარულში.
ორშაბათი რომ ჩამოწითლდება
მოვა ოროსნობაში გაჩხერილი
სამოსანი სამშაბათი
ნაცრისფერი, თაგვისფერი
უფრო რუხი სამშაბათი
ხვალ კი ჩინური ახალი წელია
და გადავწყვიტე
სახლში დარჩენა.
იცოდეთ, რომ არ მაქვს
ფული.
ვერ დაგპატიჟებთ კინოში
ანდა თეატრში
ანდა ტაილანდურ რესტორანში
სადაც ოთხკუთხედ, ხანაც
მრგვალ თეფშებზე
ახვავებენ ბრინჯს
ხვადასხვა გარნირებით.
უფრო შარშან
უფრო შარშანწინ
მე გაძლევთ ნებას
შემიყვაროთ.
მაქვს კლასიკური ცხვირი
და თითქმის არ მაქვს ტუჩები
გახუნებული თმიდან
მომიჩანს შუბლი
მეტად ჭკვიანი
ხოლო თვალები
ჩემი საწვიმარივით ფერადი.
სწორედ ამ წუთს,
სწორედ ახლა
უფრო შარშან
უფრო შარშანწინ
რასაკვირველია
მე აქ ვიყავი
თქვენ კი ფიქრობთ
რომ ეს ლექსი არ არის.