წინაპართა მტკიცე ნაკვალევი,
სისხლმორწყული შენი მთა და მდელო
ბრძოლის ჟინი და სიცოცხლის ეშხი
მადლიანი ჩემი საქართველო.

აღმართული ციხე-ტაძრის ბჭენი
უფლის ლოცვით ზეცით განიხვნენო,
მადლიანი მიწა-წყალი შენი
სულისდგმავ და სალოცავო ჩვენო.

იბერის და ივერიის მხარევ,
კოლხიდავ და საომარო ლელო
ათასწლეულ ჟამთა მეინახევ
დატანჯულო ჩემო საქართველო..

აიეტის მეფის დარბაზებო
შადრევნებო სამოთხისებრ მჩქეფო,
ცხვრის საწმისის ოქროს ნაწნავებო
და ასულო სიოს მონაბერო

ფარნაოზის წიგნო საფიცარო
წმინდა ნინოს ვაზის ლერწმის ჯვარო,
მირიანის რწმენავ საოცარო
გორგასალის ჩუმი ნატვრა ხარო...

წმინდა აბოს შუშანიკის რწმენავ
ხანძთელისა სულის სავანეო,
წინაპართა სიწმინდევ და ლხენავ
ვაზო ნაზო მუხის ხეო მხნეო.

არსაკიძის სიყვარულო უზადო,
ხელოვნების მუზავ რწმენის ტაძარო
ძელიცხოვლის წმინდა ხეო ნაზარდო
უფლისციხეს მიწავ ნაემბაზარო...

სალოცავო დავითის და თამარის
რუსთაველის ზმანებავ სათაყვანო,
მათი  რწმენა, მათი ფიქრი აქ არის
იავნანავ დარწეულო აკვანო.

ვინ დასთვალოს ჩვენში გმირთა სიმრავლე
ანდა მათი შემართება ქართული,
ცოტნესი თუ თევდორესი გმირობა
შენი დიდი საოცარი წარსული.

მართალია იყო ბევრჯერ ღალატი
სიმხდალე და ნირწამხდარი მზაკვრობა,
მაგრამ მაინც წმინდა შუქი დაგნათის
ბოროტს ისევ კვლავ კეთილმა აჯობა.

სააკაძის აღმართულო მახვილო
ქეთევანის წამებულო სიცოცხლე,
პაატას და ჩვენთა გმირთა აჩრდილნო
ვფიცავ მარად ჩვენს გულებში იცოცხლებთ...

სულხან-საბას წმინდა ცრემლო ნამულო
ვახტანგ მეფის სიწმინდევ და მსაჯულო,
ბესიკის ხმავ სევდიანო ზღაპრულო
და დავითის რწმენავ გულო ქართულო.

ბრწყინვალეს თუ სიმონ მეფის თავდადება,
შემართება და მხნეობა ერეკლესი
სიცოცხლის და სიყვარულის ქადაგება
და კარდაკარ სიარული დემეტრესი...

გმირების და რაინდების გამზრდელო
ცხრა ძმისა და გმირთა დედის დედავ,
წყნეთელის და წავკისელის მშობელო
სიციცხლის აზრს მხოლოდ შენში ვხედავ.

ილია მართლის სულის ზეობა
აკაკის სიბრძნე  და სათნოება,
ვაჟას სიყმე და მოცალეობა
ენა, მამული, სარწმუნოება...

ცად ანაფრენო ტატოს მერანო
გალაკტიონის ნმთაწმინდის მთვარევ...
მცხეთავ ვარძიავ წმინდა გელათო
სხვა მე შენსავით ვერ შევიყვარე...

წარსულის და აწმყოს ჩუმო ვედრებავ
მომავლის რწმენავ სანატრელო,
გულის ძგერავ და სიცოცხლის მშვენებავ
სულ გიმღერებ მუდამ საქართველო!

14.06.2007წელი