***
გაყინული ზურგით გზაზე ჩამომჯდარ
                  მზეს მივეყუდე,
ჩრდილზე,ჩემს თმასთან ერთად,
      შენზე ფიქრი ჩამოიშალა...
.....................................................

***
თუ გინდა გავითვალოთ...
ცხვირი კედელს მიადე,
თითებშეტყუპებული ხელებით კი,
საფეთქლებს მიებჯინე,
რომ, შემთხვევით, თვალი არ მომკრა.
დაიხუჭე...
დაითვალე...
უჩემოდ დარჩენილი
შენი ცხოვრების დღეები...

..................................

***
ჩემი ორმოები ლავიწებთან,
ერთი პატარა, მეორე დიდი.
მყესიდან ამოვარდნილი ძვლის გამო.
ამბოხია...
გარღვეული წესრიგი!
საკუთარი ძვალიც განმიდგა,
გამშორდა...
ჩონჩხი მიატოვა.
ახლა კანით ვაკავებ,
სხეულში,
ჩემით თავგაბეზრებულ
ადამიანებს...

..................................

***
შენი თითები, ჩემს სახეზე,
ნაზად ცეკვავდნენ ვენურ ვალსს.
მუსიკა შევაჩერე...
სულიშემძვრელად მიყუჩდა სამყარო,
ლოყებიდან ტუჩებამდე ჩამოვაცურე
                    შენი ხელი,
კანის სურნელი უჯრედებში ჩაიკირა
შენი ხელი სახეზე ავიფარე,
სახლში ვიყავი...
კედლებამოყვანილ, გადახურულ სახლში.
არ მჭირდებოდა რამე ნიღაბი...
აღარც მინდოდა ყოფნა სხვა ხალხში...
ერთში ვიყავი...
აღარ მახსოვს როგორ გაკოცე,
მახსოვს ჩასუნთქვა ვცადე, მაგრამ
ყელზე უზარმაზარი კრეისერი მომდგომოდა.
სხვა გზა არ მქონდა და მეც,
გემის ფსკერს გამოყოლილი,
მარილიანი ცრემლი გადმოვაგდე თვალიდან...