როცა უფროსმა დამ თვლა ისწავლა,
დედა ორმოს იღებდა,
უფროსი და ლობიოს მარცვლებს თვლიდა,
შემდეგ ორმოში ყრიდა,
დედა მიწას აყრიდა...

როცა შუათანა ძმამ თვლა ისწავლა,
დედა ორმოს იღებდა,
შუათანა ძმა ლობიოს მარცვლებს თვლიდა,
შემდეგ ორმოში ყრიდა,
უფროსი და მიწას აყრიდა..

როცა უმცროსმა დამ თვლა ისწავლა,
უფროსი და ორმოს იღებდა,
უმცროსი და ლობიოს მარცვლებს თვლიდა,
შემდეგ ორმოში ყრიდა,
შუათანა ძმა მიწას აყრიდა...

როცა უფროსი და წავიდა
შუათანა ძმა იღებდა ორმოს,
უმცროსი და ლობიოს მარცვლებს ყრიდა ორმოში,
დედა მიწას აყრიდა...

როცა შუათანა ძმა წავიდა,
უმცროსი და იღებდა ორმოს,
დედა ლობიოს მარცვლებს ყრიდა
და თავადვე აყრიდა მიწას...

როცა უმცროსი და წავიდა,
დედა ორმოს იღებდა,
თვლიდა ლობიოს მარცვლებს,
ორმოში ყრიდა
და თავადვე აყრიდა მიწას...

როცა მოსავალი მოვიდა,
დედამ უფროს დას მისცა თავისი წილი მოსავალი,
შუათანა ძმამ უმცროსი დის წილიც წაიღო
და უკან აღარ დაბრუნებულა...
უმცროს დას არ შეხვდა მოსავალი.
უფროსი და დუმდა ამის შესახებ,
შუათანა ძმა ბრაზობდა უმცროსს დაზე,
დედა წუხდა.

როცა დედა წავიდა,
უფროსი და მადლიერი იყო დედის...

როცა დედა წავიდა,
შუათანა ძმამ შვილებს დაურიგა
თავისი და უმცროსი დის წილი...

როცა დედა წავიდა,
უმცროსმა დამ დააყარა მიწა დედას...

როცა დედა წავიდა
უმცროსმა დამ თვლა ასწავლა შვილებს...

(როცა დედა წავიდა,
უმცროსი და უამბობდა შვილებს,
თუ როგორ წავიდა დედა)...