ჩემთან მოდი,
განა რამე, მოდი ისე,
სულ უბრალოდ, როგორც თუნდაც გუშინ,
მერე ჩემი გულის ცემა მოისმინე,
ან მაჯაზე დამითვალე პულსი.
მანამ, სანამ დამიდგენდე არითმიას,
ამომიშრე ამღვრეული მზერა,
რაც უშენო შეგრძნებები განმიცდია,
ყველა ერთად გადავდენე რემად...
ახლა თითქოს დროს თვალებით ვემტერები,
წვიმა უკრავს ჩემს ფანჯრებზე ლოდინს,
ღამე ქუჩას ძაღლებივით ეტანება,
რახანია გეძახი და მოდი
ტუჩზე შენი ცხელი სუნთქვა შემატოვე,
დღეს გიჟიც ვარ, ჭკვიანიც და შლეგიც,
მერე თუ გსურს უმიზეზოდ მიმატოვე,
წასვლამდე კი ამიჩეჩე თმები.
იქნებ აღარც გაგიბრაზდე სულელურად
იქნება სულაც აღარ გაგებუტო,
მაგრამ ახლა მოდი, გინდაც უნებურად,
თუ გიყვარდე... უნდა ჩამეხუტო!